Meischter! U13 Schwizermeischter!

„der Champions-League-Finau isch ä Schissdräck dergägä, numä chaute Kaffee“

 

… das si d’Wort vomenä Vater u är het eifach rächt … was da in Genf isch abgange … das chamä nid beschriebe, das muess mä gspürä.

 

HÄRZLÄCHI GRATULATION U13-MEITSCHI

 

… dir sid der absolut Wahnsinn! Was dir a denä 2 Täg bote heit, isch grandios, wäutklass. „Das gseht us wie Profivolleyball“ (het ä angere Vater gseit)… JA … würkläch, das het sich so agfühlt.

 

Gaaanz viu chlini Mosaiksteindli si zumenä erfougriichä Ganze zämäbout worde u ds‘Ergäbnis dervo isch dä hoch verdient U13-Schwiizermeistertitu vo üsnä U13-Meitschi.

 

Dass so öpis mügläch wird, da bruchts so viu derzuä. Ohni taläntierti, motivierti, engagierti, fokussierti Ching geit gar nüt. Mehreri Trainier hei mit denä Meitschi gschaffet u d’Ilena het dä Rohdiamant fertig gschliffe. Zämäarbeit vo aunä Beteiligte isch perfekt gsi. D‘Ilena macht ä extrem guete Job u zämä mit em Leroy het sie ds’Bestä us denä Meitschi usäghout. Das Duo het üsi U13-Girls mit top Trainings/ärä top Usbiudig, mit ihrer fordernde, zielgrichtete, motivierende Art u mit ganz viu Humor u Härzlächkeit zu däm riiiesä Erfoug gführt.

D A N K E   D A N K E   D A N K E   !!!

 

Ganz ganz ä wichtige u ganz ä grossä Mosaikstei sit dir Eutere. Ohni öii Ungerstützig u Mitförderig vo öinä Ching geit das niä. Dir heit ghulfe, em Volleybau Priorität ds’gäh u öii Ching ou vo daheime us für’s Volleybau motiviert.

D A N K E   D A N K E   D A N K E   !!!

 

 

Aber natürläch si nid numä d‘Meitschi in Genf gsi, sondern ou üsi Buebä!

 

Uf der Rangliste nid ganz so wit vor wie d’Meitschi, aber vo dä Gfühl här nid weniger intensiv derbi.

Dir heit super gspiut u mega grossi Fortschritte gmacht!

Äs riiiiesä grosses Merci Manuel und Christoph. Dir sit so ungloubläch motivierend u positiv, grossi Vorbiuder für üsi Gielä. Öpis bessers chönnt üsnä Jungs nid passiere!

Ou aui Jungs-Eutere: Was sou ig schriebe … klar giut für öich ou aues, was ig bi dä Meitschi-Eutere ha gschriebe. Dir heit em Manuel u sinä Jungs u em ganze Volero öies Härz gschänkt. Was gits schöners! Mir chömä grad wieder Tränä, wenn ig a öich aui dänkä! (ou das gilt für d’Meitschi-Eutere).

D A N K E   D A N K E   D A N K E   !!!

 

Ou aunä angerä Fans, wo in Genf si cho ungerstütze äs grosses MERCI. Ou aunä, wo vo daheimä us hei mitgfieberet u vielläch sogar der Finau uf Instagram hei mitverfougt MERCI!

 

Die Emotione, wo in Genf si sichtbar worde, das isch so einzigartig und wunderschön. Mir aui si in Genf ei Familie gsi, hei zämä glachet, grännet, gsunge, gschroue, trummelet, glöggelet, viu Spass gha, enang unterstützt, enang umarmet …

Das Erläbnis U13-SM 2019 in Genf wird für üs aui unvergässläch bliebe.

 

Und … schön blibt d‘U13-SM witerhin bestah. Mir hei üs igsetzt derfür u Swissvolley het sich Gott sei Dank derzuä entschlosse, dä Event bidsbhaute.

 

Der Familie Petitat no ganz ä bsungrige Dank für’s Sponsoring vo dä  U13-Meitschi-Ilouf- u Fan-T-Shirts.

D A N K E   D A N K E   D A N K E   !!!

 

Vo vo Volero … Hiä hiä Volero!!!

 

 

Öii ungloubläch stouzi MINI-Verantwortlächi Doris

 

Facebook
Facebook
YouTube
YouTube
Instagram

Ein Kommentar

  1. Das war ein super Wochenende in Genf, hat mich sehr schwer beeindruckt das Ganze. Das Turnier, unsere Coaches, die unglaubliche Fähigkeit die Kids so zu motivieren das so etwas Schönes zum Schluß bleibt. Ps: nächstes mal gehen wir Eltern auch ins Hotel. Bis bald Liebe Grüße vom Jucher, Detligen, Matthias.

Kommentar hinterlassen

Deine E-Mail-Adresse wird nicht veröffentlicht. Erforderliche Felder sind mit * markiert.